دۆزینەوەی ڕەگی کار

 

دۆزینەوەی ڕەگی کار

بۆ دۆزینەوەی ڕەگی کار، دەکرێت بە شێوەی ڕێزمانی و وردەکاری هەموو جۆرەکانی فرمان لە زمانی کوردیدا ڕوون بکرێنەوە و دانە بە دانە باسیان بکرێت، ئەوە بابەتێکی چڕوپڕی ڕێزمانییە، زۆر جار خوێندکار لێی ئاڵۆز دەبێت و فێربوونی ئاسان نییە، بەڵام لێرەدا بە شێوەیەکی ئاسانتر شێوەی دۆزینەوەی ڕەگی کار ڕوون دەکەینەوە کە فێربوونی زۆر سادە و سانایە:

 

دۆزینەوەی ڕەگی کار:

هەر کارێکمان هەبێت بۆ نموونە لە دۆخی چاوگدا، دەیکەینە دۆخی ڕانەبردووی یەکەم کەسی سادە:
نموونەی ١:

“خواردن”، دەکەینە دۆخی ڕانەبردووی یەکەم کەسی سادە، واتە: (خواردن) دەکەینە (دەخۆم).

دە + خۆ + م = دەخۆم.

پاشان ئەگەر “دە” … “م” لابەرین، ئەوە ڕەگی کار دەمێنێتەوە: “خۆ“.

کەوا بێت ڕەگی کاری “خواردن” دەبێتە: “خۆ“.

نموونەی ٢:

“کڕین”: دۆخی ڕانەبردووی یەکەم کەسی سادە: = دەکڕم: دە + کڕ + م = دەکڕم.

ڕەگی “کڕین” = “کڕ“.

ڕەگی “هاتن” وا بەدەست دێت: د + ێ + م = دێـم.

ڕەگی “هاتن” = “ێ”.

چەند نموونەی تر بۆ دۆزینەوەی “ڕەگی کار” لەم خشتەیەی خوارەوەدا ببینن:

چاوگ	ڕانەبردوو		ڕەگی کار
کڕین	دەکڕم	دە	کڕ	م
خوێندن	دەخوێنم	دە	خوێن	م
کردن	دەکەم	دە	کە	م
ڕژاندن	دەڕژێنم	دە	ڕژێن	م
نووسین	دەنووسم	دە	نووس	م
بەزاندن	دەبەزێنم	دە	بەزێن	م
فڕین	دەفڕم	دە	فڕ	م
بردن	دەبەم	دە	بە	م
بوون	دەبم	دە	ب	م
چوون	دەچم	دە	چ	م
چاندن	دەچێنم	دە	چێن	م
دروون	دەدرووم	دە	دروو	م
سەندن	دەسێنم	دە	سێن	م
برژاندن	دەبرژێنم	دە	برژێن	م
کۆکین	دەکۆکم	دە	کۆک	م
ناردن	دەنێرم	دە	نێر	م
وتن، گوتن	دەبێژم	دە	بێژ	م
وتن، گوتن	دەڵێم	دە	ڵێ	م
خواستن	دەخوازم	دە	خواز	م
گەستن	دەگەزم	دە	گەز	م
پاراستن	دەپارێزم	دە	پارێز	م
شوشتن	دەشۆم	دە	شۆ	م
شۆردن	دەشۆرم	دە	شۆر	م
سپاردن	دەسپێرم	دە	سپێر	م

تاقیکاری:

ئەگەر پێتان وایە ئەو بابەتە باش فێر بوون فەرموون لەم تاقیکارییەدا کە لەسەر دۆزینەوەی ڕەگی کار ئامادە کراوە بەشداری بکەن:

 

تاقیکاریی دۆزینەوەی ڕەگی کار

 

 

 

وەرگیراوە لە فێرگەی زمانی کوردی

ل?لاي?ن : ڕێزمانی کوردی

ب?اوکردن?و?